“Бунга эришамиз ва бу тезда амалга ошади”: Трамп Украина ва Эрон ҳақида
АҚШ президенти Россия-Украина можаросини ҳал қилиш жараёни тезлашганини маълум қилди.
Дональд Трамп Россия ва Украина ўртасидаги ҳарбий можаро, шунингдек, АҚШ ва Эрон ўртасидаги уруш тез орада ҳал қилинишини маълум қилди. Унинг айтишича, бу борада музокаралар жадал давом этмоқда.
Трамп бу ҳақда Нью-Йорк штатида Республикачилар партиясидан губернаторликка номзодни қўллаб-қувватлаш митингида сўзлаган. У Россия ва Украина ўртасида келишувга эришилишига ишонч билдирган.
“Биз бунга эришамиз ва бу тезда амалга ошади. Мен яна иккита урушни ҳал қилиш арафасидаман”, — деган АҚШ президенти.
Ушбу баёнот Трампнинг Россия президенти Владимир Путин билан телефон орқали суҳбатидан кейин янграган. Томонлар суҳбат давомида Украина атрофидаги вазият ва бошқа масалаларни муҳокама қилган. Россия президенти ёрдамчисининг маълум қилишича, Путин Киевнинг ҳаракатлари тинчлик музокараларига тўсқинлик қилаётганини таъкидлаган.
Майамида АҚШ, Украина ва Европа давлатлари вакиллари иштирокида ҳам музокаралар бўлиб ўтган. Учрашувларда можарони қиш бошланишидан олдин тугатиш имкониятлари, дон экспорти, узоқ муддатли хавфсизлик кафолатлари ва Украинанинг урушдан кейинги тикланиши муҳокама қилинган.
Reuters хабарига кўра, томонлар яқин ҳафталарда можарони ҳал қилиш бўйича ягона таклифни келишиб, кейин уни Россияга тақдим этишни режалаштирмоқда.
Трамп Truth Social тармоғидаги постида ўзи саккизта можарони ҳал қилганини даъво қилган эди. У Покистон ва Ҳиндистон, Камбоджа ва Таиланд, Сербия ва Косово, Конго ва Руанда, Исроил ва Эрон, Миср ва Эфиопия, Арманистон ва Озарбайжон, шунингдек, Исроил ва ҲАМАС ўртасидаги можароларни санаб ўтган.
АҚШ президенти ушбу можароларнинг ҳар бири учун Нобель тинчлик мукофотига лойиқ бўлганини айтган. Шунингдек, у Нобель қўмитасининг қарорини танқид қилган ва мукофотнинг берилиш тартибидан норозилигини билдирган.
