Давлат тўнтаришига уриниш айблови: собиқ президентнинг ўғли 4 йилга қамалди
Султанбековнинг аввалги судланганлиги бўйича ўталмаган жазо қисми ҳам ҳисобга олиниб, якуний жазо муддати 7 йил этиб белгиланди.
Қирғизистоннинг собиқ президенти Алмазбек Атамбаевнинг ўғли Қодирбек Атамбаев давлат ҳокимиятини зўрлик билан эгаллашга уриниш иши бўйича 4 йилга озодликдан маҳрум қилинди. Суд унинг мол-мулкини мусодара қилиш ҳақида ҳам қарор чиқарди. Бу ҳақда AKIpress хабар берди.
Бишкек шаҳрининг Первомай туман суди 8 октябрь куни мазкур иш бўйича ҳукмни эълон қилди. Қодирбек Атамбаев ва Социал-демократлар партияси етакчиси Темирлан Султанбеков ҳокимиятни зўрлик билан эгаллашга уринишда айбдор деб топилди.
Султанбеков ҳам мазкур иш доирасида 4 йилга озодликдан маҳрум этилди. Бироқ унинг 2025 йилда овозларни сотиб олиш иши бўйича аввал тайинланган жазосининг ўталмаган қисми ҳам ҳисобга олиниб, якуний қамоқ муддати 7 йил этиб белгиланди. Унинг ҳам мол-мулки мусодара қилинади.
2025 йил ноябрь ойининг охирида Қирғизистон ҳуқуқ-тартибот органлари оммавий тартибсизликларни режалаштиришда гумон қилиб, 10 кишини ҳибсга олган. Улар орасида Қодирбек Атамбаев, Темирлан Султанбеков, собиқ депутатлар Шайлубек Атазов ва Кубаничбек Қодиров, шунингдек, собиқ президентнинг собиқ тан қўриқчиси Дамир Мусакеев ҳам бўлган.
Тергов маълумотларига кўра, гумонланувчилар навбатдан ташқари парламент сайловларидан кейин мамлакатнинг жанубидан бошлаб оммавий норозилик намойишларини ташкил этишни режалаштирган. Дастлаб уларга оммавий тартибсизликларга тайёргарлик кўриш айби қўйилган. Кейинчалик Қодирбек Атамбаев ва Темирлан Султанбековга нисбатан айблов ҳокимиятни зўрлик билан эгаллашга уриниш моддаси бўйича ўзгартирилган.
Суд жараёни 2026 йил июль ойида бошланган ва ёпиқ эшиклар ортида ўтказилган. Ҳимоя томони суд мажлисларини очиқ ўтказишни сўраган, бироқ бу илтимос рад этилган. Судланувчилар ва уларнинг вакиллари тергов томонидан илгари сурилган воқеалар талқинига қарши чиққан.
