Андижонда оғир ЙТҲ: уч киши ҳалок бўлди
Юк машинасининг тормоз тизимида носозлик юзага келиб, еттита автомобиль билан тўқнашган.
2026 йил 10 октябрь куни соат 09:40 ларда Булоқбоши тумани «Нефтчилар» МФЙ, Кончилар кўчасида оғир йўл-транспорт ҳодисаси содир бўлди.
Андижон вилояти ИИБ ЖХХ ЙҲХБ ахборот хизматининг маълум қилишича, дастлабки маълумотларга кўра, «Нефтчилар — Кулла» йўналишида ҳаракатланган, 1978 йилда туғилган ҳайдовчи бошқарувидаги тупроқ ортилган HOWO юк машинасининг тормоз тизимида носозлик юзага келган. Натижада ҳайдовчи бошқарувни йўқотган.
Юк машинаси қарама-қарши йўналишда ҳаракатланаётган Cobalt, Nexia, BY Song Plus ва Nexia-2 автомобиллари, шунингдек, йўлнинг ўнг томонида тўхтаб турган Nexia-3, Damas ва Matiz билан тўқнашган. Ҳодиса оқибатида кўча бўйидаги дўконларга ҳам зарар етган.
ЙТҲ натижасида уч киши воқеа жойида ҳалок бўлган. HOWO ҳайдовчиси ва яна уч нафар фуқаро турли тан жароҳатлари билан туман шифохонасига ётқизилган.
Мазкур ҳолат юзасидан Булоқбоши тумани ИИБ ҳузуридаги Тергов бўлими томонидан Жиноят кодексининг 266-моддаси 3-қисми билан жиноят иши қўзғатилган. Ҳозирда ҳодисанинг барча ҳолатларини аниқлаш бўйича дастлабки тергов ҳаракатлари олиб борилмоқда.
