АҚШ Украинага қурол етказиб беришни тўхтатиш билан таҳдид қилмоқда — Financial Times
Вашингтон Киевга Россия энергетика инфратузилмасига зарбаларни тўхтатиш бўйича босим ўтказмоқда.
Дональд Трамп маъмурияти Украинани Россия энергетика инфратузилмасига ҳужумларни тўхтатишга ундаш мақсадида мамлакатга Америка қуролларини етказиб бериш механизмини тўхтатиш билан таҳдид қилмоқда. Бу ҳақда Financial Times нашри европалик расмийларга таяниб хабар берди.
Нашр суҳбатдошларига кўра, АҚШ вакиллари шанба ва якшанба кунлари Европа давлатлари ҳамда Украина расмийлари билан боғланиб, Россия нефтьни қайта ишлаш заводларига берилаётган зарбаларни тўхтатиш масаласида босим ўтказган.
Европалик расмийлар Вашингтоннинг огоҳлантиришларида разведка маълумотларини алмашишни тўхтатиш таҳдиди ҳам бўлганини айтган. Шунингдек, Украинага Америка қуролларини харид қилиш имконини берувчи PURL механизмини тўхтатиш масаласи ҳам тилга олинган. Ушбу механизм доирасида қуроллар Европа давлатлари маблағлари ҳисобидан харид қилинади.
АҚШ Мудофаа вазирлиги ходимидан қўнғироқ олган амалдорлардан бири нашрга вазиятни қуйидагича изоҳлаган: “Улар Киевга қўнғироқ қилишмоқда... улар Европадаги ҳаммага қўнғироқ қилишмоқда”.
АҚШ расмийлари билан боғланган шахслар орасида Украина президенти Владимир Зеленскийнинг ҳарбий маслаҳатчиси, 93-механизациялашган бригаданинг собиқ генерали Павло Палиса ҳам борлиги айтилмоқда.
Оқ уй мазкур қўнғироқлар юзасидан изоҳ беришдан бош тортган.
Бу хабарлар Трампнинг Россия президенти Владимир Путин билан Россия дизель ёқилғисини Америка ва жаҳон бозорларига етказиб бериш бўйича келишувни эълон қилгани ҳақидаги хабарлар ортдан янгради. Зеленский эса АҚШнинг Россияга қарши санкцияларни бир томонлама юмшатиши ва Россия дизель ёқилғиси экспортига рухсат бериши ҳақидаги қарорни адолатсиз деб атаган.
Шунингдек, Оқ уй Трамп Зеленскийнинг Украина сайловларини ўтказиш учун 60 кунлик кенг қамровли сулҳга эришиш таклифини кўриб чиқаётгани ёки йўқлигига аниқлик киритмаган.
