Ўзбекистонда ўз мобил паллиатив хизматига эга илк болалар хосписи ташкил этилмоқда
Лойиҳа доирасида болаларга уйда тиббий ва психологик ёрдам кўрсатилади.
Самарқанд вилоятида оғир ва даволаб бўлмайдиган касалликларга чалинган болаларга уй шароитида тиббий ва ижтимоий ёрдам кўрсатиш бошланди. Ҳудудда бундай ёрдамга муҳтож 300 нафардан ортиқ бола аниқланган.
28 сентябрдан иш бошлаган мобил бригада таркибига тиббиёт мутахассислари, ижтимоий ходимлар ва психологлар киритилган. Улар болаларга уйида ёрдам кўрсатади, оғриқ ва бошқа касаллик аломатларини енгиллаштиришга кўмаклашади. Шунингдек, болалар ва уларнинг яқинлари учун индивидуал ёрдам режаси ишлаб чиқилади, ота-оналарга парвариш кўникмалари ўргатилади.
Ижтимоий ҳимоя миллий агентлиги директорининг биринчи ўринбосари Шаҳноза Мирзиёеванинг таъкидлашича, лойиҳанинг мақсади оилаларга боланинг эҳтиёжларидан келиб чиқиб, ёрдамни уйда ёки хосписда олиш имкониятини яратишдир.
«Боланинг ташхисини ўзгартиришга ожизмиз, аммо унинг ҳар бир кунини ўзгартириш ўз қўлимизда», — деди у.
«Инсон» ижтимоий хизматлар марказлари ҳар бир бола учун алоҳида кейс очади ва зарур ижтимоий хизматлар ҳамда техник реабилитация воситаларини олишда ёрдам беради. Жумладан, болалар эҳтиёжига мос ногиронлик аравачалари, вертикализаторлар, функционал каравотлар ва ётоқ яраларининг олдини олувчи матраслар билан таъминланишига кўмаклашилади.
Айни пайтда Ижтимоий ҳимоя миллий агентлиги томонидан болалар хосписи қурилиши ҳам давом этмоқда. Мобил паллиатив хизмат ва хоспис оғир касалликларга чалинган болалар ҳамда уларнинг яқинларини қўллаб-қувватлашга қаратилган ягона ёрдам тизимининг таркибий қисмлари бўлади.
