Тошкентда қарздорлик сабаб MALIBU-2 хатланди

Бюронинг Яккасарой туман бўлими иш юритувида фуқаролик ишлари бўйича Мирзо Улуғбек туманлараро судининг 2026 йил 2 сентябрдаги ижро варақасига асосан қарздор б.К.дан ундирувчи “H.F.C.” МЧЖ фойдасига 567 млн сўм миқдоридаги қарздорликни ундириш билан боғлиқ ижро ҳужжати мавжуд.

 

Ижро иши доирасида қарздорнинг мулкий ва молиявий ҳолати ўрганилиб, тегишли ташкилотларга сўровлар юборилди. Олинган маълумотлар асосида қарздорнинг банк ҳисобварақларига ҳамда унга тегишли автотранспорт воситасига нисбатан қонунчиликда белгиланган тартибда чекловлар ўрнатилди.

 

Шу билан бирга, давлат ижрочиси томонидан қарздорга қарздорликни ихтиёрий равишда тўлаш зарурлиги бир неча маротаба тушунтирилиб, тегишли тартибда огоҳлантирилган. Бироқ кўрилган чораларга қарамасдан, қарздорлик ихтиёрий равишда бартараф этилмади.

 

Натижада, ижро ҳужжати талабларини амалда таъминлаш мақсадида қарздорга тегишли "MALIBU 2" русумли автотранспорт воситаси белгиланган тартибда хатланди ҳамда онлайн-аукцион савдоларига чиқарилмоқда.

 

Автотранспорт воситасини реализация қилишдан тушган маблағлар қонунчиликда белгиланган тартибда ундирувчи тадбиркор фойдасига йўналтирилиб, мавжуд қарздорликни қоплашга сарфланади.

 

Мазкур ҳолат яна бир бор суд ҳужжатида белгиланган мажбуриятларни ўз вақтида ва ихтиёрий равишда бажариш муҳимлигини кўрсатади. Чунки қарздорликни ихтиёрий равишда бартараф этмаслик мол-мулкни хатлаш, чекловлар қўллаш ва уни мажбурий тартибда реализация қилиш каби ижро чораларига сабаб бўлиши мумкин.