Тошкентда кредит қарзи сабаб кўчмас мулк хатланди

Бюронинг Тошкент шаҳар бошқармаси Алоҳида муҳим ижро ишларни ижро этиш шўъбаси иш юритувига Фуқаролик ишлари бўйича Шайхонтоҳур туманлараро судининг 2026 йил 6 апрелдаги ижро варақаси келиб тушган.

Мазкур ижро ҳужжатига асосан, қарздорлар — “W.L.” МЧЖ ва фуқаро Х.Н.дан ундирувчи банк ХАТБ фойдасига жами 319 316,47 АҚШ доллари миқдоридаги қарздорликни ундириш, ундирувни фуқаро Ю.А.га тегишли, 300 000 АҚШ долларига баҳоланган Тошкент шаҳар, Сергели тумани, Султонобод МФЙда жойлашган кўчмас мулкка қаратиш белгиланган.

Ижро ҳужжати 2026 йил 8 апрель куни шўъба иш юритувига келиб тушиб, шу куннинг ўзида ижро иши юритиш тўғрисида қарор қабул қилинган.

Қонунчилик талабларига мувофиқ, қарздорларга қарздорликни ихтиёрий равишда қоплаш учун муддат берилган. Бироқ белгиланган муддатда мажбурият бажарилмагани сабабли мажбурий ижро ҳаракатларига киришилган.

Жумладан, гаров мулки ҳисобланган мазкур кўчмас мулк белгиланган тартибда хатланган.

Айни вақтда кўчмас мулкни “E-AUKSION” электрон савдоларига чиқариш чоралари кўрилмоқда. Савдо натижасида тушган маблағлар қонунчиликда белгиланган тартибда ундирувчи банк фойдасига йўналтирилиб, қарздорликни қоплашга сарфланади.