16 та ўйинда 16 та ғалаба: Ўзбекистон ёшлари робототехника бўйича жаҳон чемпиони бўлди
Ўзбекистон терма жамоаси FIRST Global Challenge мусобақасида мутлақ чемпионликка эришди.
Жанубий Кореянинг Инчеон шаҳрида дунёнинг қарийб 200 та давлати вакиллари иштирок этган халқаро робототехника мусобақасида Ўзбекистон ёшлари юқори натижа қайд этди. Терма жамоа 3 та олтин медални қўлга киритиб, мутлақ чемпионликка эришди.
Ўзбекистон вакиллари мусобақадаги 16 та ўйиннинг барчасида ғалаба қозониб, 637 балл тўплади ва мусобақа рекордини ўрнатди.
FIRST Global Challenge — дунёнинг турли мамлакатларидан иқтидорли мактаб ўқувчиларини бирлаштирадиган халқаро робототехника мусобақаси. Бу йилги беллашув ўрмон ёнғинларининг олдини олиш, уларнинг оқибатларини камайтириш ва табиатни қайта тиклаш масалаларига бағишланди.
Ўзбекистонлик ёш муҳандислар ушбу экологик муаммоларга инновацион муҳандислик ечимларини тақдим этиб, ўз билим ва салоҳиятини намоён этди.
