8 та банк жаримага тортилди: Марказий банк қоидабузарликларни аниқлади
Марказий банк пруденциал меъёрлар ва қонунчилик талабларини бузган банкка нисбатан жарима санкцияларини қўллади.
Марказий банкнинг Банк назорати қўмитаси 2026 йил сентябрь ойида 8 та йиғилиш ўтказиб, жами 37 та масалани муҳокама қилди ва улар юзасидан тегишли қарорлар қабул қилди. Бу ҳақда регулятор матбуот хизмати хабар берди.
Кўриб чиқилган масалаларнинг 21 таси рўйхатга олиш ва рухсат бериш йўналишига тегишли бўлди. Жумладан, кредит ташкилотлари уставига киритилган ўзгартиришларни рўйхатдан ўтказиш, микромолия ташкилотларини ҳисоб рўйхатидан ўтказиш, аккредитация ва тўлов ташкилотига лицензия бериш масалалари кўриб чиқилди.
Шунингдек, кредит ташкилотларининг устав фондидаги улушларига эгалик қилиш учун рухсат бериш, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимлар номзодларини кўриб чиқиш билан боғлиқ масалалар муҳокама қилинди.
Қўмита кредит ва тўлов ташкилотларининг молиявий ҳолатига оид 16 та масалани ҳам кўриб чиқди. Улар орасида Марказий банк кўрсатмалари ва пруденциал меъёрлар талабларига риоя этилиши, банклар ва нобанк кредит ташкилотларида ўтказилган инспекция текширувлари натижалари, шунингдек, молиявий хизматларни “тартибга солиш қумдони” доирасида синовдан ўтказиш масалалари бор.
Пруденциал нормативлар ва қонунчилик талабларига риоя этилмагани, шунингдек, инспекция текширувларида аниқланган қоидабузарликлар сабабли 8 та банкка нисбатан жарима санкциялари қўлланилди.
