Давлат харидларида рақобат талаблари бузилди: 10 млрд сўмлик қонунбузилишлар аниқланди
Рақобат қўмитаси бир нечта вилоятдаги давлат ташкилотларининг харидларини ўрганиб, тендер ва танловларда рақобатни чеклаш аломатларини аниқлади.
Рақобат қўмитасининг ҳудудий органлари томонидан давлат харидлари соҳасида ўтказилган мониторинг ва мурожаатларни ўрганиш натижасида қарийб 10 млрд сўмлик харидларда қонунбузилиш ҳолатлари аниқланган. Қўмита маълумотига кўра, Андижон вилоятида Олтинкўл тумани ҳокимлиги Ободонлаштириш бошқармасининг 300 млн сўмлик харидларида қонунбузилиш аломатлари қайд этилган.
Фарғона вилоятида “Фарғона туман йўллардан фойдаланиш” давлат муассасасининг 7 та, жами 2,5 млрд сўмдан ортиқ хариди, Жиззах вилоятида эса Зарбдор туманидаги заиф эшитувчи болалар учун ихтисослаштирилган 2-сонли мактаб-интернатнинг 2 та, жами 1,4 млрд сўмдан ортиқ хариди ўрганилган.
Шунингдек, Наманган вилоятидаги Чуст туман тиббиёт бирлашмасининг қарийб 1,8 млрд сўмлик, Навоий вилоятидаги Хатирчи давлат ўрмон хўжалигининг 7 та, жами қарийб 1,7 млрд сўмлик харидларида ҳам қонунбузилиш ҳолатлари аниқланган.
Самарқанд вилоятида “Ўзйўлкўприк кластери” Самарқанд филиалининг 1,7 млрд сўмлик ҳамда «Озодлик» давлат муассасасининг 410 млн сўмлик харидлари бўйича ҳам тегишли чоралар кўрилган.
Қайд этилишича, энг яхши таклифларни танлаш ва тендер савдоларини ўрганиш давомида “Рақобат тўғрисида”ги қонуннинг 29-моддаси талабларига риоя қилинмагани аниқланган. Хусусан, савдоларда рақобатни чеклайдиган ёки чеклашга олиб келиши мумкин бўлган ҳаракатлар қайд этилган.
Ҳолатлар юзасидан қўмитанинг ҳудудий бошқармалари махсус комиссиялари томонидан буюртмачи ташкилотларга нисбатан ишлар қўзғатилган. Қонунбузилишларни бартараф этиш, айрим ҳолатларда молиявий жарималар қўллаш ва ҳуқуқий баҳо бериш учун материалларни тегишли органларга юбориш чоралари кўрилган.
Бундан ташқари, келгусида шундай ҳолатларга йўл қўймаслик учун буюртмачи ташкилотларга бажарилиши мажбурий бўлган кўрсатмалар берилган.
