Фарғона йўлида “A” йўлаклар назоратга олинди: камералар ўрнатилди
Тошкентда автобус йўлакларига кирадиган автомобиллар назорати кучайтирилмоқда.
Тошкент шаҳридаги Фарғона йўлида жамоат транспорти учун ажратилган махсус йўлакларда ҳаракатни назорат қилувчи камералар ўрнатилди. Бу ҳақда пойтахт транспорт инфратузилмасини ривожлантириш бўйича амалга оширилаётган ишлар доирасида маълум қилинди.
Камералар йўлнинг 6 километрли қисмида, ҳар икки йўналишдаги «А» махсус йўлакларга ўрнатилган. Пойтахтнинг бошқа кўчаларида ҳам автобус йўлаклари бўйлаб ҳаракатни назорат қилувчи камералар босқичма-босқич ишга туширилмоқда.
Махсус йўлаклар автобусларнинг тирбандликларга тушиб қолмасдан, белгиланган жадвал асосида ҳаракатланиши ва йўловчиларни манзилларига ўз вақтида етказиши учун мўлжалланган.
Маълум қилинишича, битта автобусда бир вақтнинг ўзида 50 нафардан ортиқ йўловчи бўлиши мумкин. Шу сабабли, бошқа транспорт воситаларининг автобус йўлакларига кириши жамоат транспорти ҳаракатига халақит бериб, кўплаб йўловчиларнинг кечикишига сабаб бўлиши мумкин.
Эслатиб ўтамиз, соат 06:00 дан 23:00 гача тегишли рухсатга эга бўлмаган транспорт воситаларининг «А» махсус йўлакларда ҳаракатланиши тақиқланади.
