Пахта теримида 132 та қонунбузилиш аниқланди: 8,8 млрд сўмдан ортиқ пул ундирилди
Давлат меҳнат инспекцияси пахта йиғим-терими мавсумида 145 та мониторинг ўтказиб, мажбурий меҳнат, иш ҳақларини кечиктириш ва меҳнат шартномаларининг мавжуд эмаслиги билан боғлиқ ҳолатларни қайд этди.
Давлат меҳнат инспекцияси томонидан пахта йиғим-терими мавсумида меҳнат қонунчилигига риоя этилиши юзасидан ҳудудларда ўтказилган мониторинглар давомида 132 та қонунбузилиш ҳолати аниқланди. Бу ҳақда инспекция маълум қилди.
Жорий йилнинг 10 октябрь ҳолатига кўра, жами 145 та мониторинг ўтказилган. Аниқланган қонунбузилишларнинг 3 таси фуқароларни мажбурий меҳнатга жалб этиш, 18 таси меҳнат шароитлари талабларига риоя қилмаслик, 25 таси терим пулларини ўз вақтида бермаслик билан боғлиқ.
Шунингдек, 86 та ҳолатда теримчилар билан меҳнат шартномаси тузилмагани аниқланган. Қонунбузилишлар юзасидан 46 та ҳолат бўйича жами 172,8 млн сўм жарима белгиланган. Шундан 44 та ҳолатда Маъмурий жавобгарлик тўғрисидаги кодекснинг 49-моддаси асосида 106,8 млн сўм, яна 2 та ҳолатда 51-модда асосида 66 млн сўм жарима қўлланилган.
Бундан ташқари, масъулларга 32 та ёзма кўрсатма берилган. Инспекция маълумотига кўра, теримчиларга тўланиши керак бўлган 8 млрд 870,6 млн сўм маблағ ундириб берилган.
Давлат меҳнат инспекцияси пахта теримида ишчиларнинг меҳнат ҳуқуқларини ҳимоя қилиш, терим пулларининг ўз вақтида тўланишини таъминлаш ва мажбурий меҳнатнинг олдини олиш бўйича мониторингларни давом эттиришини билдирган.
