Самарқандда Cobalt электроскутерни уриб юборди: икки киши ҳалок бўлди
ЙТҲ оқибатида бир киши воқеа жойида, яна бири шифохонада вафот этган.
2026 йил 9 октябрь куни соат 13:00 лар атрофида Самарқанд вилояти Пахтачи туманидаги 4К-560 автомобиль йўлининг 14-километрида йўл-транспорт ҳодисаси содир бўлди. Бу ҳақда Самарқанд вилояти Ички ишлар бошқармаси Йўл ҳаракати хавфсизлиги бошқармаси маълум қилди.
Қайд этилишича, Cobalt русумли автомобиль ҳайдовчиси Миркан–Мисит йўналишида ҳаракатланиб кетаётиб, йўлнинг ўнг томонидан тўсатдан чиқиб қолган велосипедчини уриб юбормаслик учун рулни чап томонга бурган.
Натижада ҳайдовчи бошқарувни йўқотиб, қарама-қарши йўналишга чиқиб кетган ва ўз йўналишида қатнов қисмининг чап чеккаси бўйлаб ҳаракатланаётган электроскутерни уриб юборган.
Ҳодиса оқибатида электроскутердаги йўловчилардан бири воқеа жойида вафот этган. Ҳайдовчи ва яна бир йўловчи шифохонага ётқизилган. Шифокорлар томонидан кўрсатилган муолажаларга қарамай, иккинчи йўловчи ҳам шифохонада вафот этган.
Мазкур ҳолат юзасидан Пахтачи тумани Ички ишлар бўлими Тергов бўлинмаси томонидан жиноят иши қўзғатилиб, дастлабки тергов ҳаракатлари олиб борилмоқда.
