44 млн сўмга сотилаётган қалбаки долларлар: уч киши ушланди
Қалбаки пуллар Туркиядан олиб келингани аниқланган.
Самарқанд шаҳрида 7 400 АҚШ доллари миқдоридаги қалбаки банкнотларни сотишга уринган уч нафар фуқаро қўлга олинди. Улар қалбаки пулларни 44 миллион сўмга сотаётган вақтида ушланган.
Давлат хавфсизлик хизмати, Божхона ва Ички ишлар органлари ходимлари ҳамкорлигида Самарқанд шаҳрида ўтказилган тезкор тадбирда қалбаки хорижий валютани муомалага киритишга уриниш фаолияти фош этилди. Хусусан, Тойлоқ туманида яшовчи, 1996, 2002 ва 2003 йилларда туғилган уч нафар фуқаро қўлга олинди.
Аниқланишича, улар 100 долларлик қалбаки банкнотлардан иборат жами 7 400 АҚШ долларини шартли харидорга 44 миллион сўмга сотган вақтида қўлга олинган. Қалбаки купюралар Туркиядан олиб келингани маълум бўлган.
Шунингдек, қўлга олинганларнинг икки нафари муқаддам судлангани аниқланган.
Ҳозирда ҳолат юзасидан терговга қадар текширув ҳаракатлари олиб борилмоқда. Қалбаки валюта савдосига алоқадор бошқа шахсларни аниқлаш чоралари кўрилмоқда.
