АҚШ Гренландия ресурсларига қизиқмоқда: Трамп нефть ва газ лойиҳаларини маълум қилди

АҚШ президенти Доналд Трамп Гренландияда нефть, газ ва фойдали қазилмаларни кенг кўламда қидириш ишлари бошланишга тайёрланаётганини маълум қилди. У бу ҳақда 14 октябрь куни ўзининг Тruth Social ижтимоий тармоғидаги саҳифасида ёзган.

Трампнинг таъкидлашича, Гренландияда дунёнинг бошқа ҳудудларига қараганда осонроқ ўзлаштирилиши мумкин бўлган нефть захиралари жуда катта. Бироқ у бу даъвони тасдиқловчи тадқиқотлар, лойиҳада иштирок этадиган компаниялар ёки қидирув ишлари қачон бошланиши ҳақида аниқ маълумот бермаган. АҚШнинг ушбу жараёндаги иштироки қандай бўлиши ҳам ҳозирча номаълум.

Трамп ўз баёнотида Гренландиянинг АҚШ ва Европа хавфсизлиги учун аҳамиятини ҳам алоҳида таъкидлаган. Унинг фикрича, келажакда АҚШга қарши амалга оширилиши мумкин бўлган ҳаво ҳужумлари Гренландия орқали ўтиши мумкин. Президент оролнинг географик жойлашуви ракеталар, дронлар ва бошқа таҳдидларни аниқлаш ҳамда уларга қарши чоралар кўришда муҳимлигини билдирган.

Маълумот учун, ўтган ой АҚШ, Дания ва Гренландия раҳбарлари Арктикадаги хавфсизликни мустаҳкамлашга қаратилган келишувни имзолаган эди. Ҳужжат АҚШнинг оролдаги ҳарбий иштирокини кенгайтириш, иккита янги ҳарбий база ташкил этиш ва Трамп илгари сурган “Олтин гумбаз” ракетага қарши мудофаа тизимини жойлаштириш имкониятларини назарда тутади. Шу билан бирга, келишув Даниянинг суверенитетини ва Гренландия аҳолисининг ўз тақдирини ўзи белгилаш ҳуқуқини тасдиқлайди.