Эронга қарши янги ҳужум эҳтимоли: Трамп ва Нетаняху бир неча бор музокара ўтказган
Трамп ҳозирча якуний қарорга келмаган, унинг маслаҳатчиларининг аксарияти эса иқтисодий босимни давом эттириш тарафдори.
Дональд Трамп ва Исроил бош вазири Бенямин Нетаняху Эронга қарши кенг кўламли ҳарбий операцияни қайта бошлаш эҳтимолини муҳокама қилган. Бу ҳақда Исроилнинг N12 телеканали хабар берди.
Манбаларга кўра, сўнгги икки ҳафта давомида икки мамлакат расмийлари ўртасида бир неча бор музокаралар ўтказилган. Нетаняху қўшма зарбалар зарурлигини Эроннинг ядровий дастурини қайта тиклашга уринаётгани ҳақидаги хавотирлар билан изоҳлаган.
Ахios хабарида айтилишича, ўтган ҳафта бўлиб ўтган телефон суҳбати чоғида ҳам Исроил бош вазири Эрон ядровий дастурига оид разведка маълумотларидан хавотир билдирган. Муҳокамаларда ҳарбий ва ядровий объектларга АҚШ ва Исроил томонидан биргаликда зарба бериш эҳтимоли кўриб чиқилган.
Бироқ Трамп бу борада ҳозирча қатъий қарор қабул қилмаган. Манбаларнинг билдиришича, унинг позицияси ўзгариб турибди. Пентагон раҳбари Пит Хегсет ва АҚШ Марказий қўмондонлиги вакиллари ҳарбий амалиётларни қайта бошлаш тарафдорлари сифатида тилга олинган. Трамп маслаҳатчиларининг аксарияти эса иқтисодий санкциялар ва бошқа босим чораларини давом эттиришни маъқул кўрмоқда.
Хабарларга кўра, 2 октябрь куни Кемп-Девидда Трамп маъмуриятининг юқори лавозимли вакиллари можаронинг кейинги босқичлари ва Эронга қайта зарба бериш эҳтимолини муҳокама қилиш учун узоқ давом этган учрашув ўтказган.
Исроил ҳарбий раҳбарияти ҳам можаронинг қайта бошланиши оқибатларидан хавотирда. N12 маълумотига кўра, Исроил армияси бош штаби раҳбари Эял Замир америкалик ҳамкасблари билан суҳбатда янги ҳарбий ҳаракатлар ва Эроннинг жавоб зарбалари Исроилдаги сайловларни кечиктиришга олиб келиши мумкинлигини билдирган.
Исроилда парламент сайловлари 27 октябрга, АҚШда эса Конгресснинг оралиқ сайловлари 3 ноябрга белгиланган. Шу сабабли Эронга қарши кенг кўламли ҳарбий операциянинг қайта бошланиши сиёсий жиҳатдан ҳам сезгир масала бўлиб қолмоқда.
Манбаларнинг таъкидлашича, АҚШ ва Исроил ҳарбийлари юқори шайлик ҳолатида қолмоқда ва Трамп қарорини ўзгартирган тақдирда ҳаракатларни қайта бошлашга тайёргарлик кўрмоқда.
