Фарғонада тезлик фожиаси: BMW ҳайдовчиси ЙТҲда вафот этди
Ҳайдовчи кескин бурилишда тезликни ошириб, бошқарувни йўқотган ва устунга урилган.
Фарғона вилоятининг Фурқат туманида ҳайдовчилик гувоҳномаси бўлмаган BMW ҳайдовчиси тезликни ошириши оқибатида бошқарувни йўқотиб, ҳалокатга учради. ЙТҲ оқибатида ҳайдовчи ҳалок бўлган. У аввал ҳам гувоҳномасиз автомобиль бошқаргани учун огоҳлантирилган ва унга нисбатан қонуний чора кўрилган.
Бу ҳақда Йўл ҳаракати хавфсизлиги хизмати хабар берди.
Маълум қилинишича, Қўқон шаҳрида йўл ҳаракати хавфсизлигини таъминлаш ва қўпол қоидабузарликларнинг олдини олиш мақсадида рейдлар ўтказилмоқда. Текширувлар давомида ҳайдовчилик гувоҳномаси бўлмаган йигитга автомобиль бошқармаслик ҳақида огоҳлантириш берилган. Шунга қарамай, у яна рулга ўтирган.
Ҳодиса Фурқат туманидаги кескин бурилишда содир бўлган. Ҳайдовчи тезликни ошириши натижасида автомобиль бошқарувини йўқотган. Машина аввал огоҳлантирувчи устунга, кейин бетон устунга ва дарахтга урилган. Тўқнашув оқибатида автомобиль ариққа тушиб, ағдарилган.
ЙТҲ пайтида автомобилда бўлган йўловчининг айтишича, улар Бешариқ туманидан Қўқон шаҳри томон ҳаракатланган. Тезлик соатига 100 километрдан ошган. Бошқа автомобилни қувиб ўтишга уриниш вақтида ҳайдовчи бошқарувни йўқотган. Йўловчи тўқнашув пайтида олд ойнадан бир неча метр узоқликка отилиб кетганини, ҳайдовчини топганида эса унда ҳаёт аломатлари бўлмаганини айтган.
