Андижондаги мактабда ўқувчи қизлар муштлашди: синф раҳбари ишдан олинди
Уч нафар ўқувчи қизнинг ўзаро тортишуви жанжалга айланган.
Ижтимоий тармоқларда Андижон вилояти Олтинкўл туманидаги мактаблардан бирида ўқувчи қизларнинг ўзаро муштлашгани акс этган видео тарқалди. Мактабгача ва мактаб таълими вазирлиги Ахборот хизмати ҳолат юзасидан изоҳ берди.
Маълум қилинишича, воқеа жорий йилнинг 13 октябрь куни соат 14:00 атрофида Олтинкўл тумани «Қўштепа» маҳалласида жойлашган 11-умумтаълим мактабида, танаффус вақтида содир бўлган. Уч нафар ўқувчи қизнинг ўзаро тортишуви жанжалга айланган.
Ҳолат назоратга олиниб, туман мактабгача ва мактаб таълими бўлими масъуллари, профилактика инспектори, мактаб раҳбарияти ҳамда ўқувчиларнинг ота-оналари иштирокида профилактик суҳбат ўтказилган.
Суҳбат якунида ота-оналарга нисбатан Маъмурий жавобгарлик тўғрисидаги кодекснинг 47-моддасини қўллаш бўйича ҳужжатлар расмийлаштирилган. Шунингдек, синфни назорат қилишда йўл қўйилган камчиликлар сабабли синф раҳбари ўз вазифасидан озод этилган.
Вазирлик маълумотига кўра, 2014 йилда қурилган мазкур мактабда 998 нафар ўқувчи таҳсил олади. Уларга 67 нафар педагог таълим-тарбия беради.
