Нукусда МИБ орқали автоҳалокат натижасида етказилган зарар ундириб берилди
Маълум бўлишича, ҳайдовчи бошқа автомашинага йўл бермаганлиги оқибатида тўқнашиб, унга 54 млн сўм моддий зарар етказган.
Фуқаро Е.Т. ўзига тегишли “COBALT” русумли автотранспорт воситасини Қўнғирот тумани, Нукус кўчасида бошқариб келаётганида, фуқаро А.Ю.нинг бошқарувидаги “KIA” русумли автомашинага йўл бермаганлиги оқибатида, ушбу автомашина билан тўқнашиб, унга 54 млн сўм моддий зарар етказган.
Етказилган зарарларни ҳуқуқбузардан ундириш ҳақида Жиноят ишлари бўйича Шуманай туман суди томонидан 2026 йил 23 июль куни қарор чиқарилган.
Ушбу қарорга асосан чиқарилган ижро варақаси Мажбурий ижро бюроси Нукус шаҳар бўлими иш юритувига келиб тушган ва бўлим давлат ижрочилари томонидан ижро ҳаракатларига киришилган.
Хусусан, қарздорнинг номидаги 2 та автомашинага тақиқ ўрнатилган ҳамда ижро ҳужжати талабини бажармаслик қўшимча ундирувларга сабаб бўлиши тўғрисида огоҳлантириш берилган.
Шунинг натижасида, ундирувчи Бюронинг Нукус шаҳар бўлимига келиб, етказилган 54 млн сўм зарарларни тўлиғи билан олганлигини билдирган.
