2 200 мегаваттлик 6 та лойиҳа: қуёш ва шамол станциялари очиқ танловга чиқарилади

 

Президент Шавкат Мирзиёев ёқилғи-энергетика соҳаси инвесторлар билан мулоқотда янги электр станцияларини жойлаштириш ва лойиҳаларни танлаш тартибини такомиллаштириш зарурлигини таъкидлади.

 

Давлат раҳбарига кўра, дастлаб «яшил» энергия қувватларини тез яратиш мақсадида лойиҳалар кўпинча инвесторлар таклиф қилган ҳудудларда жойлаштирилган. Бу инвестицияларни жалб қилишга ёрдам берган бўлсада, айрим ҳудудларда қувватларнинг тўпланиши электр энергиясини бошқа ҳудудларга етказиш харажатларини оширган.

 

“Бизга алоҳида-алоҳида электр станциялари эмас, узвий боғланган энергетика тизими керак”, — деди Президент.

 

Эндиликда қайси ҳудудда қандай электр қуввати зарурлиги олдиндан режалаштирилади ва тайёр лойиҳалар очиқ танловга чиқарилади. Танловга қўйиладиган ҳар бир лойиҳа бўйича ер майдони, электр тармоғига уланиш нуқтаси ва муддати, электр энергиясини харид қилиш ҳамда тўлов шартлари олдиндан эълон қилинади.

 

Барча инвесторлар учун тенг талаблар белгиланиб, тўлов интизоми ва хатарларни камайтириш механизмлари мустаҳкамланади.

 

Яқин вақтда умумий қуввати 2 200 мегаватт бўлган олтита қуёш ва шамол электр станцияси лойиҳаси очиқ танловга чиқарилади. Президент инвесторларни ушбу танловларда иштирок этишга таклиф қилди.

 

Шунингдек, энергетика соҳасининг 2050 йилгача бўлган Миллий бош режаси ишлаб чиқилиб, очиқ эълон қилинади. Келгуси йил 1 мартгача электр тармоқларига уланиш имкониятлари харитаси, 1 июлгача эса тўлиқ бош режа тақдим этилади.

 

Ушбу ҳужжатларда электр энергиясига талаб қайси ҳудудларда ошиши, қандай инфратузилма зарурлиги ва янги қувватларни қаерда жойлаштириш самарали бўлиши кўрсатилади. Бу инвесторларга узоқ муддатли режаларини олдиндан тузиш имконини беради.

 

Бундан ташқари, «яшил» энергия ишлаб чиқарувчиларга сертификатлар ва карбон кредитлари орқали қўшимча даромад олиш имконияти яратилади. Ушбу даромадни давлат ва инвесторлар ўртасида адолатли тақсимлаш механизмлари жорий этилади. Бунда халқаро экологик мажбуриятлар ва амалдаги шартномалар ҳисобга олинади.