Автобус ҳаракати давомида ёнғин содир бўлдими? Расмий муносабат билдирилди
Ҳодисадан сўнг автобус йўналишдан чиқарилиб, автобус саройига қайтарилган.
Ижтимоий тармоқларда «Тошшаҳартрансхизмат» АЖга қарашли автобус ҳаракати давомида ёнғин чиққани ҳақида хабарлар тарқалди. Мазкур ҳолат юзасидан расмий муносабат билдирилди.
Маълум қилинишича, 1-автобус саройига қарашли, давлат рақами 01 641 BКА, сарой рақами 159 бўлган SAZ LE60 русумли автобус ҳаракатланаётган вақтда унинг турбокомпрессор қисмидан тутун чиққан.
Ҳайдовчи Бахтиёр Маматов автобусни зудлик билан тўхтатиб, йўловчиларни туширган. Ҳодиса оқибатида ҳеч ким жабрланмаган.
Дастлабки маълумотларга кўра, автобуснинг турбокомпрессор қисмларида носозлик аниқланган. Бу ёнилғининг тўлиқ ёнмаслиги ва тутун ҳосил бўлишига сабаб бўлган. Корхона ушбу ҳолатда ёнғин содир бўлмаганини маълум қилди.
Қайд этилишича, автобус ҳодиса куни эрталаб техник кўрикдан ўтказилган ва ўша вақтда соз ҳолатда бўлган. Ҳозирда транспорт воситаси йўналишдан чиқарилиб, автобус саройига қайтарилган. Техник носозликларни бартараф этиш чоралари кўрилмоқда.
«Тошшаҳартрансхизмат» АЖ автобуслар ҳар куни йўналишга чиқарилишидан олдин белгиланган тартибда техник кўрикдан ўтказилишини таъкидлади.
