Икки йиллик дастур: Чекка ҳудудлардаги мактабларга ёш мутахассислар юборилади
Мутахассислар мактабларда ишлаш билан бирга педагогик ва лидерлик бўйича тренинглардан ўтади.
“Teach for Uzbekistan” (TFU) ва Тошкент давлат шарқшунослик университети (ТДШУ) ўртасида ҳамкорлик меморандуми имзоланди. Келишув чекка ҳудудлардаги мактабларда хорижий тиллар, жумладан, шарқ тилларини ўқитиш сифатини ошириш ва ўқувчилар учун таълим имкониятларини кенгайтиришга қаратилган.
Меморандумга кўра, университетнинг иқтидорли битирувчилари икки йиллик педагогик ва лидерлик дастури — Fellowship доирасида олис ва чекка ҳудудлардаги мактабларга жалб этилади. Улар мактабларда тўлиқ ставкада дарс бериш билан бирга, педагогик маҳорат ва бошқарув кўникмаларини ривожлантиришга қаратилган интенсив тренингларда иштирок этади.
Дастур қатнашчиларига иш ҳақидан ташқари қўшимча молиявий ва методик кўмак ҳам кўрсатилади. Фелловшип дастурини тамомлаган мутахассислар 60 дан ортиқ мамлакатни бирлаштирган “Teach For All” халқаро тармоғи битирувчилари мақомига эга бўлади.
Ҳамкорлик доирасида чекка ҳудудлардаги мактаб ўқувчиларининг билим даражасини ошириш, хорижий тилларни ўрганиш имкониятларини кенгайтириш, шунингдек, тил клублари ва ижтимоий лойиҳаларни ривожлантириш кўзда тутилган.
