Мактабдаги қизлар жанжали: директор ўринбосарига ҳайфсан берилди
Шунингдек, синф раҳбарларига қатъий огоҳлантириш билдирилган.
Самарқанд тумани 49-сонли умумий ўрта таълим мактабида ўқувчи қизлар ўртасида жанжал юз бергани ҳақида тарқалган хабар юзасидан расмий муносабат билдирилди.
Самарқанд вилояти Мактабгача ва мактаб таълими бошқармаси ахборот хизматига кўра, ҳодиса 2026 йил 12 октябрь куни содир бўлган. Ҳолат тегишли ташкилотлар масъуллари иштирокида атрофлича ўрганилган.
Ўрганиш давомида мактаб маъмурияти ва масъул педагоглар томонидан камчиликларга йўл қўйилгани аниқланган. Шу муносабат билан мактаб директорининг маънавий-маърифий ишлар бўйича ўринбосарига ҳайфсан интизомий жазоси берилган, синф раҳбарларига эса қатъий огоҳлантириш билдирилган.
Шунингдек, жанжалда иштирок этган ўқувчиларнинг ота-оналарига нисбатан қонунчиликка мувофиқ маъмурий чоралар кўрилган.
