Тошкентда ҳаво сифати ёмонлашди: айрим ҳудудларда ифлосланиш даражаси ошди
Айрим ҳудудларда қисқа муддатли носоғлом даража қайд этилган.
16 октябрга ўтар кечаси Тошкент шаҳрида ноқулай метеорологик шароитлар таъсирида атмосфера ҳавоси сифати ёмонлашди.
Маълумотларга кўра, 15 октябрь соат 21:00 дан бошлаб Халқаро ҳаво сифати индекси (АQI) бўйича кўрсаткичлар сезгир гуруҳлар учун носоғлом даражага кўтарилган. Энг юқори кўрсаткичлар 16 октябрь соат 00:00 атрофида кузатилган, айрим ҳудудларда эса қисқа муддатли носоғлом даража қайд этилган.
Тунда ҳаво ҳарорати 11,8 даражагача пасайган, шамол тезлиги 0,7–1,5 м/с атрофида бўлган. Кучли ҳарорат инверсияси сабаб ҳаво алмашинуви сусайиб, PМ2.5 ва PМ10 майда заррачалари ер юзасига яқин қатламда тўпланган.
Прогнозларга кўра, 16 октябрь куни Тошкентда ҳаво сифати асосан АQI бўйича ўртача даражада бўлиши кутилмоқда. Кечга яқин айрим ҳудудларда ҳаво сифати қисқа муддатга сезгир гуруҳлар учун носоғлом даражага етиши мумкин.
Миллий ҳаво сифати индекси бўйича кўрсаткичлар асосан яшил, айрим ҳудудларда эса сариқ даражада бўлиши прогноз қилинмоқда.
Айни пайтда атмосфера ҳавоси сифати Махсус комиссия томонидан доимий мониторинг қилиб борилмоқда.
