Украинадаги можаро Зеленскийсиз ҳал қилиниши мумкин — Трамп

Дональд Трамп Украинадаги можаро якунда ҳал қилинишини, бироқ бу жараён Украина президенти Владимир Зеленский иштирокисиз кечиши мумкинлигини билдирди. У бу ҳақда Newsmax нашрига берган интервьюсида гапирган.

“Менимча, улар охир-оқибат у ёки бу тарзда ечим топади. Лекин бу унинг иштирокисиз бўлади, чунки у келишувни истамайди”, — деган Трамп. Унинг фикрича, Зеленский тинчликка эришиш истаги ҳақида гапирсада, амалда бу борада етарли ҳаракат қилмаяпти.

Трамп, шунингдек, Украина томонидан Россиянинг нефтни қайта ишлаш заводларига берилаётган зарбаларни танқид қилди. Унинг айтишича, бундай ҳужумлар жаҳон бозорида нефть нархининг ошишига олиб келиши мумкин ва Украина бошқа нишонларга эътибор қаратиши керак.

АҚШ президенти Зеленский билан ишлаш қийинлигини ҳам таъкидлаган. У Россия президенти Владимир Путин ва Украина раҳбарининг музокарага тайёрлигини солиштирар экан, Зеленский билан келишувга эришиш Путинга қараганда қийинроқ эканини айтган.

Аввалроқ Зеленский Украина Россиянинг энергетика инфратузилмасига зарбаларни қайта бошлаганини билдирган эди. Унинг таъкидлашича, Киев энергетика объектларига ҳужумларни вақтинча тўхтатиш бўйича келишувга риоя қилган, бироқ Россиянинг ҳаракатларини кузатиб боради.

The Wall Street Journal нашри хабарига кўра, Вашингтон Киевдан Россиянинг нефтни қайта ишлаш заводларига ҳужумларни тўхтатишни камида олти марта сўраган.