«Қаттиқ чора кўринг»: аёлга шаҳвоний шилқимлик қилган йигит қамалди
22 ёшли йигит йўл бўйида савдо қилаётган аёлга номақбул таклиф билан мурожаат қилган.
Сирдарё вилояти Оқолтин тумани ҳудудидан ўтувчи М-39 магистрал йўли бўйида савдо қилаётган аёлнинг олдига маст ҳолатдаги йигит келиб, унга пул эвазига жинсий алоқа қилишни таклиф қилган.
Жабрланувчи аёл бу таклифдан норози бўлиб, ички ишлар органларига мурожаат қилган. Ҳолатни ўрганган ички ишлар ходимлари йигитга нисбатан баённома расмийлаштириб, ҳужжатларни судга тақдим этган.
Аёлнинг кўрсатмаларига кўра, у дастлаб йигитнинг чақирувига жавоб берган. Аммо унинг мақсадини англагач, воқеа юзасидан тегишли чора кўрилишини истаган.
Суд мажлисида йигит аёлнинг кўрсатмаларини тасдиқлаган. У қилмишини маст ҳолатда содир этганини айтиб, енгиллик беришни сўраган.
Жабрланувчи эса судда ҳуқуқбузарга нисбатан қатъий чора кўрилишини талаб қилган.
«Қаттиқ чора кўринг!» — дея у ўз норозилигини билдирган.
Суд жабрланувчининг кўрсатмалари ва иш материалларини кўриб чиқиб, 22 ёшли йигитга нисбатан 5 сутка маъмурий қамоқ жазосини тайинлаган.
