“Дўзах санкциялари”: Трамп Россияга қарши янги чекловларни бекор қилди
АҚШ президенти Россия нефти ва газини харид қилувчи айрим давлатларга тарифлар жорий этиш чораларини ҳам тўхтатди.
Дональд Трамп Россияга қарши янги кенг кўламли санкцияларни жорий этиш тўғрисидаги фармонни имзолади, бироқ уларни дарҳол тўхтатиб қўйди. Қонун янги чекловларни 18 октябргача жорий этишни назарда тутган эди.
BBС маълумотига кўра, Россиянинг 2022 йилда Украинага бостириб киришидан кейин АҚШ томонидан киритилган кўплаб санкциялар президентнинг ижро фармонларига асосланган. Шу сабабли Трамп уларни бекор қилиш ёки юмшатиш имкониятига эга бўлган.
Янги қонун аввалги чекловларни қонунчиликда мустаҳкамлаш билан бирга, Россияга қарши қўшимча санкциялар жорий этишни ҳам назарда тутади. Шунингдек, президентга АҚШ миллий манфаатларидан келиб чиқиб, ушбу чораларни тўхтатиб туриш ваколати берилган.
Трамп қонунда белгиланган муддат тугашидан олдинги охирги иш куни фармон чиқарган. У ҳужжатда кўзда тутилган санкциялар, чекловлар ва тарифларни тўхтатиб туришини билдирган ҳамда бундай қарор АҚШ миллий манфаатларига мос келишини Конгрессга маълум қилган.
Бу Трампнинг Россияга қарши чекловларни юмшатишга қаратилган илк қарори эмас. BBС қайд этишича, президент бундан аввал ҳам энергия нархларининг ошиши ва америкалик истеъмолчилар манфаатларини сабаб қилиб, Россия нефть маҳсулотларига оид айрим чекловларни юмшатган.
Халқаро энергетика агентлиги эса Яқин Шарқдаги уруш ва энергетика бозоридаги беқарорлик сабаб нефть таъминотидаги муаммолар 2027 йил баҳоригача давом этиши мумкинлигидан огоҳлантирган. Энергия нархларининг юқорилиги Россия нефтига қарши чекловлар масаласида АҚШ маъмуриятининг қарорларига таъсир қилиши мумкин.
Қарор 2026 йил 16 октябрда имзоланган фармонда мустаҳкамланган. Унга кўра, қонунда назарда тутилган бир қатор санкциялар ва тарифлар АҚШ миллий манфаатлари асосида тўхтатиб турилади. Фармоннинг амал қилиш муддати президент ёки ваколатли мансабдорлар кейинги чораларни зарур деб топгунига қадар давом этади.
