Қоғозбозлик ва ортиқча йиғилишлар: Ўзбекистонда ўқитувчилар учун ўзгаришлар режалаштирилмоқда
Таълим ва фан вазири педагогларнинг мақомини ошириш, маъмурий ишларини камайтириш ва таълим сифатини яхшилаш масалаларини кўриб чиқди.
Ўзбекистонда ўқитувчиларни ортиқча қоғозбозликдан халос этиш ва уларнинг жамиятдаги мавқеини ошириш масалалари муҳокама қилинди. Бу ҳақда Таълим ва фан вазири Эркинжон Турдимов Теlegram'даги саҳифасида маълум қилди.
Вазир мактабгача ва мактаб таълими йўналишлари учун масъул раҳбарлар томонидан тайёрланган тақдимотлар билан танишган. Йиғилишда таълим тизимининг ҳозирги ҳолати, мавжуд муаммолар ва уларни бартараф этиш бўйича амалий таклифлар кўриб чиқилган.
Муҳокамаларда мактабгача таълим ташкилотларида болаларни ҳар томонлама ривожлантириш ва мактабга сифатли тайёрлаш, умумтаълим мактабларида эса ўқув стандартларини такомиллаштириш ҳамда ўқувчиларнинг фанларни ўзлаштириш даражасини ошириш масалаларига эътибор қаратилган.
Шунингдек, педагогларнинг жамиятдаги обрўси ва мақомини ошириш, уларни ортиқча маъмурий ишлардан озод этиш ҳамда таълим тизими раҳбарияти томонидан ўтказиладиган йиғилишлар сонини сезиларли даражада камайтириш масалалари муҳокама қилинган.
Қайд этилишича, ушбу чора-тадбирлар ўқитувчиларнинг вақт ва кучини таълим сифатини ошириш, ҳар бир боланинг билим олиши ва индивидуал қобилиятларини ривожлантиришга йўналтиришга хизмат қилиши керак.
