Тошкентда алимент тўламай юрган ота қидирувда топилди
Эркакка нисбатан маъмурий қамоқ жазоси тайинлангач, у 164 млн қарзини тўлашга мажбур бўлган.
Мажбурий ижро бюроси Мирзо Улуғбек туман бўлими иш юритувидаги фуқаролик ишлари бўйича Мирзо Улуғбек туманлараро судининг 2018 йил 2 июндаги ижро ҳужжатига асосан қарздор Р.Ю.дан ундирувчи У.Ю. фойдасига вояга етмаган бир нафар фарзанди таъминоти учун ҳар ойда иш ҳақи ва бошқа даромадларининг тўртдан бир қисми миқдорида алимент ундириш белгиланган.
Бироқ қарздор бир неча бор огоҳлантирилганига қарамай, алимент тўловларини ўз вақтида амалга оширмаган. Унинг турган жойини аниқлаш имкони бўлмаганлиги сабабли қидирув чоралари кўрилган. Натижада тўпланган алимент қарздорлиги 164 миллион 586 минг 316 сўмни ташкил этган.
Мажбурий ижро бюроси Тошкент шаҳар бошқармаси Қидирув шўбаси ходимлари томонидан олиб борилган қидирув тадбирлари натижасида қарздор аниқланиб, туман бўлимига олиб келинган. Жиноят ишлари бўйича Мирзо Улуғбек туман судининг 2026 йил 15 октябрдаги қарори билан унга нисбатан 15 сутка маъмурий қамоқ жазоси тайинланган.
Кўрилган чоралар натижасида қарздордан 164 миллион 586 минг 316 сўм миқдоридаги алимент қарзи ундирилган.
