Трамп ва Путиннинг дизель келишуви: АҚШ Конгрессида уни бекор қилиш таклиф этилди
Қонун лойиҳаси қабул қилинса, Россия дизелини халқаро бозорларга етказиб беришга берилган вақтинчалик рухсат бекор қилиниши мумкин.
АҚШ Конгрессига Россия дизель ёқилғиси экспортига қўйилган айрим санкцияларни вақтинча юмшатиш ҳақидаги рухсатномани бекор қилишни назарда тутувчи қонун лойиҳаси киритилди.
Ҳужжат муаллифи — Вакиллар палатасидаги демократ конгрессмен Грегори Микс. Лойиҳани яна 16 нафар демократ ва республикачи Дон Бейкон қўллаб-қувватлаган.
"Россия билан коррупсион нефть битимларини тақиқлаш тўғрисида"ги қонун лойиҳасида АҚШ Молия вазирлигининг 9 октябрда берган рухсатномасини бекор қилиш таклиф этилган. Ушбу ҳужжат Россия дизель ёқилғисини 2027 йил 7 апрелгача халқаро бозорларга етказиб беришга имкон берган эди.
Шунингдек, қонун лойиҳаси келгусида шундай рухсатномалар берилишини тақиқлаш, Россия энергетика соҳасига АҚШ давлат инвестицияларини чеклаш ва ушбу соҳага қарши санкциялар жорий этишни назарда тутади.
Микснинг таъкидлашича, келишув америкаликларнинг харажатларини камайтирмайди, аксинча, Россия президенти Владимир Путинга Украинадаги урушни давом эттириш учун миллионлаб доллар даромад келтиради.
Эслатиб ўтамиз, АҚШ президенти Дональд Трамп 9 октябр куни Путин билан телефон орқали суҳбатлашганидан сўнг Россия дизель ёқилғисини АҚШ ва жаҳон бозорларига етказиб бериши ҳақида маълум қилган эди. Трампнинг айтишича, дастлаб 300 минг тоннадан ортиқ, ноябрда яна 500 минг тонна ва кейинчалик қўшимча 1 миллион тонна ёқилғи етказиб бериш режалаштирилган.
Трампнинг Россия ёқилғисига қўйилган чекловларни вақтинча юмшатиш қарори АҚШдаги айрим демократ ва республикачи сиёсатчилар, шунингдек, Украинанинг Европадаги иттифоқчилари томонидан танқид қилинган.
