Ўзбекистон, Қозоғистон ва Россия ҳамкорлиги: халқаро наркосавдо гуруҳи фош этилди
Мусодара қилинган 30 килограмм гашишнинг қора бозордаги қиймати тахминан 300 минг долларга баҳоланмоқда.
Қозоғистон, Ўзбекистон ва Россия махсус хизматлари ҳамкорлигида Афғонистондан гиёҳванд моддалар контрабандасини амалга оширган халқаро гуруҳ фош этилди. Бу ҳақда Қозоғистоннинг Tengrinews.kz нашри мамлакат Миллий хавфсизлик қўмитаси маълумотларига таяниб хабар берди.
Маълум қилинишича, гиёҳванд моддалар Афғонистондан “Шимолий йўналиш” деб аталувчи канал орқали олиб ўтилган.
Россиянинг Тюмен шаҳрида ўтказилган тезкор тадбир давомида халқаро гиёҳванд моддалар савдоси билан шуғулланган гуруҳнинг икки аъзоси қўлга олинган. Тинтув пайтида улардан 30 килограмм афғон гашиши мусодара қилинган.
Қозоғистон Миллий хавфсизлик қўмитаси маълумотига кўра, мусодара қилинган модданинг қора бозордаги қиймати тахминан 300 минг долларга баҳоланмоқда.
Мазкур ҳолат юзасидан Россия ваколатли органлари томонидан судгача тергов ҳаракатлари олиб борилмоқда.
