Исроиллик кўчманчилар дипломатларга ҳужум қилди: Франция мэри ҳам калтакланди
Делегация фаластинлик зайтун йиғувчилар ҳолидан хабар олиш учун босиб олинган Ғарбий Соҳилга келган.
Босиб олинган Ғарбий Соҳилдаги Тайбеҳ қишлоғи яқинида исроиллик кўчманчилар европалик дипломатлар ва Франция мэрига ҳужум қилди. Шанба куни делегация фаластинлик зайтун йиғувчилар ҳолидан хабар олиш учун келганида, исроиллик кўчманчилар уларга қарши чиққан.
Бельгия ташқи ишлар вазири Максим Прево маълум қилишича, ҳужум вақтида Бельгиянинг бош консули, Франция ва Польша дипломатлари ҳамда католик черкови вакиллари нишонга олинган. Франциялик мэр Бернар Боду ҳужумга учраган, Бельгия автомобилига зарар етказилган.
Франция ташқи ишлар вазири Жан-Ноэл Барро Исроилни ҳужумда иштирок этган кўчманчиларни ҳибсга олиш ва жавобгарликка тортишга чақирди. Бельгия ҳам ҳодисани қоралади.
Al Jazeera мухбири Нур Одеҳнинг хабар беришича, ҳужумчилар дипломатларнинг автомобилларини қуршаб олиб, уларга тош отган ва ойналарини синдирган. Ҳодиса юзасидан Исроил полицияси тергов бошлаган.
Исроил бош вазири Бинямин Нетаньяху идораси эса ҳужум ҳақидаги хабарлар ишончли далиллар билан тасдиқланиши кераклигини билдирган.
Маълумот учун, ҳужумдан бир кун олдин ҳам исроиллик кўчманчилар Рамаллоҳ шимолида АҚШлик журналистга ҳужум қилган эди. Кўчманчиларнинг зўравонликлари босиб олинган Ғарбий Соҳилда фаластинликларнинг зайтун ҳосилини йиғишига ҳам тўсқинлик қилмоқда.
