Ўзбекистон ва АҚШ муносабатлари: Марказий Осиё жаҳон матбуоти диққат марказида
Марко Рубионинг Ўзбекистонга ташрифи халқаро нашрларда ёритилди.
АҚШ давлат котиби Марко Рубионинг Ўзбекистонга ташрифи ва Самарқандда ўтказиладиган “Марказий Осиё – АҚШ” (C5+1) форматидаги учрашув хорижий ОАВ эътиборини тортди. Бу ҳақда “Дунё” ахборот агентлиги хабар берди.
Reuters, AFP, Yahoo News, Barron’s, Eurasia Review, MSN, TV5 Monde ва Internazionale нашрлари ташрифни АҚШнинг Марказий Осиёдаги дипломатик фаоллиги ортиши, минтақа давлатлари билан иқтисодий алоқаларни кенгайтириш ва стратегик шерикликни мустаҳкамлаш нуқтаи назаридан ёритмоқда.
Reuters минтақанинг табиий ресурсларга бойлиги ва Вашингтоннинг савдо-иқтисодий ҳамкорликни ривожлантиришга қизиқиши ортиб бораётганига эътибор қаратган. AFP эса АҚШнинг Марказий Осиёдаги стратегик иштирокини кенгайтириш орқали минтақа давлатлари билан муносабатларни мустаҳкамлашга интилаётганини қайд этган.
Хорижий ОАВ Самарқандда C5+1 форматида ўтказиладиган вазирлар учрашувига ҳам алоҳида эътибор қаратмоқда. Унда АҚШ ва Марказий Осиёнинг бешта давлати умумий устувор йўналишларни муҳокама қилиши кутилмоқда.
Қайд этилишича, ташрифнинг халқаро матбуотда кенг ёритилиши Марказий Осиёнинг АҚШ ташқи сиёсатидаги ўрни ортиб бораётганини акс эттиради.
