17 ёшли курьер билан можаро: Тошкентда ресторан ходимига баённома тузилди
Эркакка нисбатан тўпланган ҳужжатлар судга юборилган.
Ижтимоий тармоқларда Тошкентдаги ресторанлардан бири олдида эркакнинг вояга етмаган йигит билан жанжаллашаётгани акс этган видео тарқалди. Ҳолат юзасидан Тошкент шаҳар Ички ишлар бош бошқармаси маълумот берди.
Қайд этилишича, воқеа 2026 йил 17 октябрь куни соат 13:00 атрофида Миробод туманидаги ресторанлардан бири олдида содир бўлган. 1990 йилда туғилган С.Р. ва 2009 йилда туғилган М.Я. ўртасида келишмовчилик юзага келган.
Можаро давомида С.Р. вояга етмаган йигитга нисбатан қўпол муомалада бўлиб, жамоат тартибини бузган.
Мазкур ҳолат юзасидан Миробод тумани Ички ишлар органлари фаолиятини мувофиқлаштириш бошқармаси томонидан С.Р.га нисбатан Маъмурий жавобгарлик тўғрисидаги кодекснинг 183-моддаси — майда безорилик бўйича маъмурий баённома расмийлаштирилди. Тўпланган ҳужжатлар жиноят ишлари бўйича туман судига юборилди.
