Марихуана ва пневматик қурол: Қибрайда ноқонуний сақланган ашёлар аниқланди
Муқаддам судланган фуқаронинг ер майдонидан гиёҳвандлик воситаси топилди.
Давлат хавфсизлик хизматининг Тошкент шаҳар бўйича бошқармаси ҳамда Тошкент шаҳар Ички ишлар бош бошқармаси ходимлари ҳамкорлигида гиёҳвандлик воситаларининг ноқонуний айланмасига қарши тезкор тадбир ўтказилди.
Тадбир давомида Тошкент вилоятининг Қибрай туманида яшовчи, 1986 йилда туғилган ва муқаддам судланган фуқарога қишлоқ хўжалиги мақсадларида узоқ муддатли ижарага берилган ер майдони ҳудуди кўздан кечирилган.
Холислар иштирокида ер майдони четида жойлашган иккита контейнер текширилганда, улардан қуруқ ҳолатда сақланаётган жами 7 килограмм марихуана, ИЖ-38 русумли пневматик қурол ҳамда 12 миллиметр калибрли учта патрон топилган. Ушбу ашёлар далил сифатида олиб қўйилган.
Ҳозирда ҳолат юзасидан терговга қадар текширув ҳаракатлари олиб борилмоқда.
