“Асосий вазифа — эришилган ушбу келишувларни аниқ амалий натижаларга, яъни инвестициялар, замонавий корхоналар ва янги иш ўринларига айлантириш” — Саида Мирзиёева
Америка–Ўзбекистон ишбилармонлик ва инвестиция кенгашининг йиғилиши бўлиб ўтди.
Ўзбекистон Президенти Шавкат Мирзиёев ва АҚШ Давлат котиби Марко Рубио иштирокида Америка–Ўзбекистон ишбилармонлик ва инвестиция кенгашининг йиғилиши бўлиб ўтди. Бу ҳақда Саида Мирзиёева маълум қилди.
Унинг қайд этишича, юздан ортиқ компания вакиллари қатнашган йиғилишда сармоя киритиш, бизнесни ривожлантириш ва қўшма лойиҳаларни амалга ошириш имкониятлари муҳокама қилинган.
Саида Мирзиёева Кенгашнинг ташкил этилиши икки мамлакат ўртасидаги ҳамкорлик истиқболларини кенгайтиришини таъкидлади. Шунингдек, у ташаббусни қўллаб-қувватлагани ва Ўзбекистон билан ҳамкорликни кенгайтиришга тайёрлиги учун Марко Рубио, унинг рафиқаси Жанетт хоним ҳамда Сержио Горга миннатдорлик билдирди.
“Энди олдимиздаги асосий вазифа — эришилган ушбу келишувларни аниқ амалий натижаларга, яъни инвестициялар, замонавий корхоналар ва янги иш ўринларига айлантиришдир. АҚШ билан ҳамкорликни ривожлантиришдан кўзлаган мақсадимиз ҳам шу” — деб ёзди Президент Администрацияси раҳбари.
