Наманган, Жиззах ва Қашқадарёда кузатилган сел оқимлари уй-жойларга зарар етказмади — ФВВ

Фавқулодда вазиятлар вазирлиги 19 май куни Қашқадарё, Наманган ва Жиззах вилоятларида кузатилган сел оқимлари юзасидан маълумот берди.

Вазирлик хабарига кўра, Қашқадарё вилоятининг Қамаши, Яккабоғ, Деҳқонобод ва Шаҳрисабз туманларида кучли ёғингарчиликлар кузатилган. Қамаши туманидаги «Қизилтепа» маҳалласи Тегирмон қишлоғи ҳудудида ёмғирлар натижасида Майданак автомобиль йўлига сел-сувлари чиқиб кетган ва йўл қисқа муддатга ёпилган.

Шунингдек, Наманган вилоятининг Поп тумани “Имом ота” маҳалласи ҳамда Жиззах вилоятининг Ғаллаорол тумани «Лалмикор» маҳалласи ҳудудларида ҳам кучли ёғингарчилик оқибатида сел оқимлари кузатилган.

Поп туманида тоғ ва адирликларда шаклланган сел сувлар «Хазорат» кўчасидан оқиб ўтган бўлсада, аҳоли хонадонларига зарар етмаган. Ғаллаорол туманида кузатилган сел оқимлари ҳам сел йўллари орқали ўтиб, коммуникация тармоқлари, йўл инфратузилмаси ҳамда турар жойларга таъсир кўрсатмаган.

Фавқулодда вазиятлар вазирлиги ва тегишли ташкилотлар ходимлари ҳодиса жойларига етиб бориб, вазият оқибатларини тезкорлик билан бартараф этган. Зарарли оқибатлар қайд этилмаган.