Ўзбекистонликлар АҚШда мавсумий қишлоқ хўжалиги ишларига жалб этилади
Ўртача ойлик миқдори 3500 долларни ташкил қилади.
Ўзбекистон Миграция агентлиги раҳбари Беҳзод Мусаев АҚШнинг USA Farm Labor ташкилоти раҳбари Мануел Фик билан онлайн учрашув ўтказди. Бу ҳақда Миграция агентлиги хабар берди.
Маълум қилинишича, учрашувда ўзбекистонлик номзодларни АҚШдаги мавсумий қишлоқ хўжалиги ишларига илк бор жалб этиш механизмлари муҳокама қилинди. Мулоқот давомида иш муддати 9–10 ой, ойлик эса ўртача 3 500 доллар бўлиши, турар жой иш берувчи томонидан таъминланиши ҳамда малакали мутахассислар устуворликка эга экани белгиланди.
Учрашув якунида томонлар ҳамкорлик бўйича дастлабки келишувга эришди ва кейинги босқичларни энг тез муддатларда амалга оширишга келишиб олинди.
Маълумотларга кўра, USA Farm Labor 22 йилдан буён H-2А дастури доирасида АҚШда мавсумий қишлоқ хўжалиги ишларига хорижий ишчиларни жалб қилади ва ҳозирда 1 400 дан ортиқ фермер хўжаликлари ва ранчолар билан ҳамкорлик қилади.
