Тошкентда курьерни ҳақоратлаган қоровул 10 суткага қамалди
Суд қоровулни Маъмурий жавобгарлик тўғрисидаги кодекснинг 183-моддаси билан айбдор деб топди.
Ижтимоий тармоқларда қоровулнинг етказиб бериш ходими билан жанжаллашиб, унга нисбатан жисмоний куч ишлатгани ва ҳақорат қилгани акс этган видео тарқалди.
Юнусобод туманлараро судида мазкур иш кўриб чиқилиб, қоровулга 10 сутка маъмурий қамоқ жазоси тайинланди.
Суд мажлисида томонларнинг баёнотлари тингланди. Иш материалларига кўра, етказиб берувчи навбатдаги буюртмани топшириш учун кўрсатилган манзилга борган. Қўриқчи эса курьерга мижозга қўнғироқ қилиб, буюртмани олиш учун пастга тушишини сўрашини айтган.
Етказиб берувчининг айтишича, мижоз буюртмани олиш учун тушган ва шу вақт давомида қоровул уни ҳақорат қилган, унинг бошидан кепкасини олиб, қайтариб бермаган ҳамда қўпол муомалада бўлган.
Қоровул эса курьер бинога кириш тартибини бузганини айтган. Унинг сўзларига кўра, курьер яшовчилар билан бирга кириб кетган ва огоҳлантиришларга қарамай, бинога киришга уринган. Можаро давомида у курьерни ҳақорат қилганини тан олган.
Судда курьернинг вазифаси буюртмани манзилгача етказиш, қоровулнинг вазифаси эса бегона шахсларнинг бинога киришига йўл қўймаслик экани қайд этилган. Бироқ қоровулнинг вазиятни назорат қила олмагани ва ўз ваколатини суиистеъмол қилгани ҳуқуқий баҳолашга сабаб бўлган.
Суд қоровулни Ўзбекистон Республикаси Маъмурий жавобгарлик тўғрисидаги кодексининг 183-моддасида назарда тутилган ҳуқуқбузарликни содир этган деб топиб, унга 10 сутка маъмурий қамоқ жазоси тайинлади.
