4 кунга етган ерости йўли

 

Ижтимоий тармоқларда ниҳоясига етган йилнинг сўнгги кунида фойдаланишга топширилган Самарқанд шаҳридаги ерости йўли деворларидан кучли ёмғир оқибатида кўп миқдорда сув сизиб кираётгани акс этган видеотасвир тарқалди.

 

Шаҳар ҳокимлигининг расмий маълумотига кўра, Ибн Сино ва Рудакий кўчалари чорраҳасида бунёд этилган ерости ўтиш йўли учун 143 миллиард сўм сарфланган. 

 

Шаҳар йўл инфратузилмасини яхшилаш, аҳоли ва сайёҳлар учун қулайлик яратиш, транспорт қатнови хавфсизлиги ва барқарорлигини таъминлаш мақсадида 143 миллиард сўмлик туннель – йўл ўтказгич ва Бўстонсарой кўчасининг Сиёб канали устидаги йўл 68 миллиард сўм маблағ ҳисобига реконструкция қилинди.

 

Мазкур туннель очилиш маросимидан телевидение учун тайёрлаган лавҳада журналистнинг таъкидлашича, объект 3 йил давомида қуриб битказилиши керак бўлган.  Аммо йўл 1,5 йилда битказилган ва фойдаланишга топширилган. 

 

Қурилиш  объектининг параметрлари қуйидагича:

– йўл ўтказгич узунлиги 1 км;

– баландлиги 5,8 метр;

– кенглиги 26,4 метр;

– ёпиқ қисмининг узунлиги 120 метр.

 

Гидрометеоролог тадқиқотчи Эркин Абдулаҳатов мазкур мавзуга эътибор қаратиб, буюртмачи ва қурувчилар қарата ўринли савол қўймоқда:

 

“Хўш, лойиҳада ҳудудда кузатилган ёғинларни хавфсиз ва талофатсиз ўтказиб юборувчи дренажларни қуришда қандай ёғин миқдори инобатга олинган? Ўзи умуман, қурилиш лойиҳасида табиий омил таъсирлари эътиборга олинганми?

 

Ҳисобга олинган бўлса, нега янги объект деворларидан сув сизиб чиқмоқда? Баҳор-ёзги сел-сув тошқин келтириб чиқарадиган ҳақиқий интенсив ёғинлар даврида нима бўлади?” 

 

Шунингдек, у Самарқанд кузатув метеорологик станцияси фаолияти ҳақида ҳам тўхталиб, қурувчи ташкилотлар нега бу кузатув станцияси маълумотларидан унумли фойдаланмаганини танқид остига олади.

 

Тадқиқотчининг қўшимча қилишича, Самарқанд кузатув метеорологик станцияси ўз иш фаолиятини бошлаганига бир асрдан ошган. Йиллар давомида об-ҳаво билан боғлиқ маълумотлар шу каби қурилиш объектларини барпо этиш учун тўпланганини ҳам маълум қилган.

 

Кўприкқурилиш трести эса ушбу ҳолатга қуйидагича изоҳ беради:

“Туннель деворларига ўрнатилган плиталар қуруқ монтаж усулида ишланган, сув ўтиши йўл ўтказгичнинг конструктив элементлари мустаҳкамлигига салбий таъсир этмайди”.

 

Эслатиб ўтамиз, аввалроқ Чирчиқ дарёси устига янги кўприк қурилгани ҳамда Яккасарой ва Сергели туманларида қурилган янги йўллар бугундан очилиши ҳақида хабар берилганди.

 

Чўлпоной Аҳмедова