8 йил муддатга озодликдан маҳрум этилган Акмал Шукуровни озодликка чиқарган судьялар лавозимидан озод этилди. Бу ҳақда Судьялар олий кенгаши томонидан ўтказилган хизмат текшируви якунлари маълум қилинди.
Маълум бўлишича, Акмал Шукуровга оид жиноят иши Тошкент шаҳар суди апелляция инстанциясида кўриб чиқилиб, унинг озодликка чиқарилиши жамоатчиликда кескин норозилик ва муҳокамаларга сабаб бўлган. Шундан сўнг текширув инстанцияси ажрими билан у яна қамоққа қайтарилган ва ҳолат юзасидан судьялар фаолияти ўрганилган.
Хизмат текшируви натижасида қонун бузилишларига йўл қўйилгани аниқланиб, мазкур қарорни қабул қилган судьялар эгаллаб турган лавозимидан озод этилган. Судьялар олий кенгаши ушбу ҳолат суд-ҳуқуқ тизимида қонун устуворлигини таъминлаш йўлидаги муҳим чораларидан бири эканини таъкидлади.
Эслатиб ўтамиз, Акмал Шукуров 2025 йил 16 март куни тунда Яккасарой туманидаги “The Tower” меҳмонхонаси ёнида ресторандан чиққан K.Ye.ga тегажоғлик қилган. Аёлнинг турмуш ўртоғи А.Х. хотинининг шаънини ҳимоя қилганида Акмал Шукуров эркак ва аёлга, шунингдек, воқеа жойида бўлган E.K. га зарба берган. Бунинг оқибатида Х.А. ва Э.К. енгил тан жароҳати олишган. Воқеа сабаб унга Суд томонидан 8 йилга озодликдан маҳрум қилиш жазоси белгиланган эди.