Туркиянинг “Истанбул Башакшеҳир” клуби Ўзбекистон миллий терма жамоаси ярим ҳимоячиси Аббосбек Файзуллаев трансфери учун Москвадаги ЦСКА жамоасига тўловни амалга оширди. Бу ҳақда Россия клубининг коммуникациялар бўйича директори Кирилл Брейдо маълум қилди.
“Истанбул Башакшеҳир” жамоаси жорий йилнинг июль ойида Файзуллаев билан беш йиллик шартнома имzoлаган эди. Туркиялик журналист Усмон Алтунтерим берган маълумотларга кўра, футболчи трансфери 7 миллион еврога баҳоланган.
Аввалроқ тўлов жараёнида муаммолар кузатилгани ҳақида хабарлар тарқалган. Клуб вакиллари маблағ етишмовчилиги эмас, балки техник сабабларга кўра кечикиш бўлаётганини билдирганди. Эндиликда ЦСКА томонидан трансфер суммасининг тўлиқ қабул қилингани ва битим расман кучга киргани маълум қилинди.