Маршал Дўстумнинг мурожаати эълон қилинди. Бу ҳақда "Спутник Афганистан" хабар берди.
У халқаро ҳамжамият ва Афғонистон қўшниларидан толиблар ҳукуматини тан олмасликка чақирган. Айниқса, шимолий ва шимоли ғарбий чегарадош давлатлар (Ўзбекистон ва Туркманистон) дан буни алоҳида илтимос қилган.
Дўстум Афғонистондаги мавжуд тузумни "террор давлати" деб атаган. Шунингдек, БМТга мурожаат қилиб, Панжшердаги этник тозалашни тўхтатишни талaб қилган. Вилоятдаги гуманитар вазиятни юмшатиш ва ОАВдан жарёнларни ёритишни сўрган.
15 августда "Толибон" томонидан Кобул шаҳрининг жангсиз эгалланиши ортидан Афғонистонда ҳокимият ўзгарди. Ҳаракатга бўйсунмай келаётган ягона ҳудуд - Панжшер ҳам сентябрь бошида толиблар назоратига ўтди. Бу ерда Аҳмад Масъуд бошчилигида қаршилик ҳаракати шакллантирилган. Кейинчалик маълум бўлишича, Масъудга хоинлик қилинган. Оқибатда, Панжшер ҳам толиблар томонидан эгалланди.
Августда Абдулрашид Дўстум Мозори Шарифни ташлаб, Афғонистондан чиқиб кетган эди.
Жаҳонгир Қўзиев