Аҳмад Масъудга нисбатан хоинлик қилинган
Панжшерни эгаллангани тўғрисида янги маълумотлар пайдо бўлди. Хабарда айтилишича, бунга маҳаллий аҳоли вакилларининг хоинлиги сабаб бўлган.
Хусусан, Париён туманида толибларнинг бадахшонлик жангарилари билан маҳаллий имом ҳамда оқсоқоллар ўртасида келишувга эришилган. Оқибатда туман осонлик билан ҳаракат назоратига ўтган.
Панжшерликларнинг Шотол туманида толибларни ўраб олиши ва таъминотдан узиб қўйиши натижасида душман кўплаб аскарларидан айрилган. Аммо шимолдан қилинган ҳужум Қаршилик кучларининг бўлинишига олиб келган. Бунинг оқибатида “Толибон” бир вақтнинг ўзида ҳам шимол, ҳам жанубий йўналишдан зарба беришга муваффақ бўлган.
Ҳаракат Тохар, Бадахшон, Париён, Каписа ва Парвондаги бўлинмаларининг деярли барчасини Панжшерга қарши сафарбар қилган.
Вилоят ишғол қилинишида Қори Фасиҳуддинга панжшерлик Абдулҳамид Хуросоний катта ёрдам берган. Шу билан бирга айнан Хуросоний Покистон ҳарбий ҳаво кучларига Амрулла Солиҳнинг қароргоҳи координаталарини тақдим этган. Шундан кейин Солиҳнинг уйига авиазарба берилган.
Жангларнинг ҳал қилувчи палласида Исломободнинг аралашуви толибларга жиддий устунлик берди. Покистон махсус кучлари Саланг ҳудудига жойлашиб, дронлар зарба берадиган марралар координатасини юбориб турган.
Ҳозирда Панжшер водийси, Шотолдан Париян туманигача бўлган йўл “Толибон” томонидан назорат қилинмоқда. Абшар, Дара туманлари, шунингдек, Хазора дараси Масъуд кучлари қўлида. Бағлон вилоятидаги Андараб водийсида ҳам жанглар давом этяпти. Афғонистонда партизанлик уруши бошланган.
Бундан аввал Афғонистон масаласи бўйича махсус учрашув бўлиб ўтгани хабар қилинган эди.
Жаҳонгир Қўзиев
