Афғонистондаги Ўзбекистон фуқаролари тўлиқ эвакуация қилинганми?
Сўнги кунларда “Толибон” ҳаракати Афғонистоннинг ўнта вилоятини ўз назоратига олди. Жумладан Афғонистон шимолидаги Қундуз ва Файзобод каби йирик шаҳарлар жангарилар томонидан эгалланди.
Вазият кескинлашуви ортидан деярли барча давлатлар бирма-бир ўз фуқароларини зудлик билан Афғонистонни тарк этишга чақирмоқда. Масалан ўтган ҳафта АҚШ ва Буюк Британия ўз фуқароларини Афғонистони тарк этиш ҳақида огоҳлантиришди. Бир неча кун аввал эса Ҳиндистон Мозори Шарифдаги бош консуллиги дипломатларини эвакуация қилди. Шунингдек, Афғонистонда иқтисодий объектлар қурилишида иштирок этаётган ҳинд компаниялари ходимлари ва ҳиндистонлик журналистларга ҳам зудлик билан Афғонистонни тарк этиш тавсия этилди. Хўш бу борада Ўзбекистон қандай йўл тутмоқда?
Ушбу саволга жавоб топиш мақсадида ZAMON.UZ Ташқи ишлар вазирлиги матбуот ходими Мирзоҳид Эшонқулов билан боғланди. Мутахассиснинг сўзларига кўра бу борада фуқароларимиз билан боғлиқ ҳеч қандай муаммо мавжуд эмас.
-Бугуни кунда Афғонистонда бизнинг фуқаролар деярли қолмаган. Қийин вазиятга тушиб қолганлар бўйича ҳам мурожаатлар йўқ. Қолаверса биз Афғонистон билан чегарадошмиз ва Ўзбекистон фуқаролари учун ҳозирда чегара очиқ. Шунга қарамай муаммоли ҳолатга тушиб қолган фуқароларимиз аниқланса албатта ўз вақтида, зудлик билан ёрдам қўли чўзилади. Заруратга кўра эвакуация қилинади.
Эслатиб ўтамиз, Афғонистон ҳукумати ва “Толибон” ўртасида ҳокимиятни эгаллаш учун кескин кураш кетмоқда. Аввалроқ “Толибон” ҳаракати Фараҳ ва Бадаҳшонни эгаллагани маълум қилинган эди.
Муножат Валиева
