"Агар чиндан ҳам қайғураётган бўлсангиз, қурол юборинг!"

 

Дмитрий Кулеба Twitter'да ўз обуначилари томонидан юборилган саволларга тўғридан-тўғри жавоб берар экан, Украина кўпроқ қуролга муҳтожлигини айтди.

 

"Қурол, қурол ва яна бир бор қурол, — деди Кулеба халқаро ҳамжамиятга мурожаатида. — Биз артиллериясиз, ракета тизимларисиз рус қўшинларини ортга қайтара олмаймиз. Агар сиз ҳақиқатан ҳам Украина ҳақида қайғурсангиз, Украина ўз ҳудудларини қайтариб олишини истасангиз, бизга имкон қадар тезроқ ракета тизимларини юборинг".

 

Унинг эслатишича, бир муддат аввал Қўшма Штатлар ушбу қуролларни етказиб беришини айтган, бироқ ҳозирча етказиб берилмаган.

 

"Бизнинг улардан ягона илтимосимиз бу қарорни имкон қадар тезроқ қабул қилишдир, чунки биз учун ҳар бир кун ҳалок бўлганлар, йўқолган километрлар дегани", — деди Кулеба.

 

Унинг фикрича, бошқа давлатлар ҳам ўзлари шундай қарор қабул қилишдан олдин АҚШнинг бу қадамини кутишмоқда. Кулебанинг таъкидлашича, украина ракета тизимларини қабул қилса ва етарлича оғир қуролларга эга бўлса, Херсонни озод қила олади.

 

CNN телеканали номи ошкор этилмаган бир қанча расмийларга таяниб, Байден маъмурияти Украинага Киев сўраган илғор узоқ масофали ракета тизимларини етказиб беришга тайёрланаётгани ҳақида хабар берди.

 

Телерадиокомпания манбаларига кўра, маъмурият келгуси ҳафтада эълон қилиниши мумкин бўлган каттароқ ҳарбий ёрдам пакетининг бир қисми сифатида тизимларни жойлаштиришга интилмоқда.

 

Сўнгги кунларда АҚШ маъмурияти ва НАТО раҳбарияти Украинага аввалдан ваъда қилинган оғир қуролларни топширишни кечиктиргани учун ҳам Украина расмийлари, ҳам баъзи Ғарб сиёсатчилари томонидан танқид остига олинди.