Аҳмад Масъуд: “Биз бутун Афғонистон учун курашяпмиз”
Аҳмад Масъуднинг фикрича, “Толибон” томонидан мустабид ҳукумат ўрнатилиши турли инқирозларга олиб келади. Бу ҳақда у BBC Persian нашрига берган интервьюсида айтиб ўтди.
Масъуд мавжуд низони музокара ва ўзаро тушуниш орқали ҳал қилиш мумкинлигини таъкидлади. Шунингдек, Панжшер етакчиси бўлажак ҳукумат масаласида фикр билдирди. Хусусан, у Афғонистонда инклюзив ҳукумат тузилиши лозимлигини, мамлакатга одамларни қайтишга ундайдиган тизим яратилиши зарурлигини айтган.
Сиёсатчи “Қаршилик ҳаракати фақат Панжшерда эмас, бошқа вилоятларда ҳам мавжуд ”,-дея қайд этган. Шу билан бирга Панжшерда бутун Афғонистон ўз қадриятлари учун курашаётгани, вилоят аҳолиси толибларга зарба бериш учун етарли тажриба ва имкониятларга эгалиги таъкидланган.
Масъуд отаси ҳақида гапирар экан, Аҳмадшоҳ Масъуд мамлакат конституциясида миллий қаҳрамон сифатида киритилмаганини, аммо Афғонистон фуқаролари қалбида шу сиймода қолганини айтган.
Эслатиб ўтамиз, бундан аввал Афғонистонда “Толибон” барча инсонлар ҳуқуқини ҳимоя қилишга ваъда берган эди.
Жаҳонгир Қўзиев
