Алиментдан яширинган эркак бувисининг уйидан топилди

Бухоро вилоятининг Ғиждувон туманида салкам 10 йилдан бери алимент тўламай яширин юрган эркак бувисининг уйидан топилди. Бу ҳақида МИБ ахборот хизмати хабар берди. 

 

Қайд этилишича, фуқаролик ишлари бўйича Ғиждувон туманлараро суднинг 2015 йилдаги ижро ҳужжатига асосан қарздор Ж.A.дан ундирувчи Г.Р. фойдасига икки нафар фарзанди таъминоти учун қарздорнинг иш ҳақи ва бошқа даромадларининг 1/3 қисм миқдорида алимент ундириш белгиланган.

 

Ижро ҳужжатида алимент тўловлари ойма-ой тўлов қилиниши белгиланган бўлсада, қарздор яшаш уйидан чиқиб кетиб, тўловларни вақтида тўламагани сабабли унга нисбатан қидирув эълон қилинган. Қарздор 11 йил Россияда бўлиб, қайтиб келгач Ғиждувон туманида бувисининг хонадонида яшириниб юрган. 

 

Бошқарманинг қидирув шўбаси томонидан олиб борилган тадбирда қарздор топилиб, тегишли чора кўриш учун давлат ижрочисига топширилган. Қарздор отанинг алимент тўловларидан бўлган қарзи қайта ҳисоб-китоб қилинганда 2024 йил ҳолатида 130,6 миллион сўмни ташкил қилди. 

 

Ҳозирда қарздорга нисбатан тегишли ҳужжатлар расмийлаштирилиб, кўриб чиқиш учун тегишли судга юборилиб, 15 сутка маъмурий қамоқ жазоси қўлланилди.