Амстердамда ўнлаб исроиллик мухлислар ҳужумга учради
Оқибатда камида 12 киши жароҳатланган.
7 ноябр куни “Аякс” ва “Маккаби Тел-Авив” футбол жамоалари ўртасида ўйин бўлиб ўтди. Ediot Axronot газетасининг хабар беришича, ўйиндан олдин Исроил клуби мухлислари кўчада осилган Фаластин байроғини олиб ташлашган. Амстердам полициясининг маълумотларига кўра, буни ким қилгани ҳозирча аниқланмаган.
Ўйиндан сўнг исроилликларга шаҳарнинг бир неча жойида ҳужум уюштирилди. Улар Фаластин тарафдори шиорларни бақириб айтишган. Уларнинг баъзилари пичоқ билан қуролланган эди. Воқеа жойига полиция ходимлари етиб келди. Камида 12 киши жароҳатланган, 57 киши полиция томонидан қўлга олинган.
Исроил Миллий хавфсизлик кенгаши Амстердамдаги ўз фуқароларига меҳмонхоналарда қолишни маслаҳат берди. Ediot Axronot газетасининг ёзишича, ҳужумчилар меҳмонхоналарга ҳам бостириб киришга уринишган.
Исроил бош вазири Бинямин Нетаняҳу Исроил фуқароларига ёрдам кўрсатиш учун Нидерландияга иккита қутқарув самолётини юборишни топширди.
АҚШнинг антисемитизмга қарши курашиш бўйича махсус вакили Дебора Липштадт ҳужумларни қоралаб, улар "классик погромни даҳшатли тарзда эслатишини" таъкидлади.
"Исроил Ташқи ишлар вазирлиги раҳбари Гидеон Саар Тел-Авивдаги “Маккаби” клуби мухлисларига қилинган ҳужумдан сўнг Нидерландияга шошилинч ташриф билан йўл олмоқда", деб хабар бермоқда Ynet.
