АҚШ президенти Доналд Трамп Эронда давом этаётган норозилик намойишлари юзасидан баёнот берди. У агар Эронда тинч намойишчиларга нисбатан зўравонлик давом этса, Қўшма Штатлар уларга ёрдам беришга тайёрлигини маълум қилди.
Мазкур баёнот Трамп томонидан Truth Social ижтимоий тармоғидаги саҳифасида эълон қилинди. Унда АҚШ президенти, агар Эрон расмийлари тинч аҳолини куч ишлатиб бостиришни давом эттирса, Вашингтон бунга бефарқ қолмаслигини таъкидлаган.
Бунга жавобан Эрон Миллий хавфсизлик олий кенгаши котиби АҚШнинг бундай баёнотларини Теҳроннинг ички ишларига аралашув сифатида баҳолаб, бу бутун Яқин Шарқ минтақасида беқарорликни кучайтириши мумкинлигини айтди.
Маълумотларга кўра, 2025 йил декабрь ойининг охиридан буён Эроннинг йирик шаҳарларида норозилик намойишлари бўлиб ўтмоқда. Намойишларга маҳаллий валютанинг кескин қадрсизланиши ва иқтисодий босимлар сабаб бўлган.
Тўқнашувлар чоғида камида олти киши ҳалок бўлгани хабар қилинмоқда. Улардан беш нафари намойишчи, яна бир киши эса, оммавий ахборот воситалари маълумотига кўра, Ислом инқилоби қўриқчилари корпусига қарашли Басиж бўлинмаси аъзоси бўлган. Хавфсизлик кучлари намойишларни тарқатиш жараёнида кўз ёшартирувчи газ ва ўқотар қуроллардан фойдалангани айтилмоқда.